Görüş üç saata yaxın çəkib
Donald Tramp və Vladimir Putin Alyaskanın Ankoric şəhərindəki "Elmendorf-Riçardson" Hərbi Hava Qüvvələri bazasında görüşüblər.
Dar tərkibdə danışıqlar 2 saat 45 dəqiqə davam edib.
Görüş başlamazdan əvvəl jurnalistlər protokol çəkilişi üçün otağa buraxılıb. Lakin onlar Putinə suallar verməyə başlayanda mətbuat otaqdan çıxarılıb.
Tramp Putini hərbi aerodromda qarşıladı
ABŞ prezidenti Donald Tramp Vladimir Putini Alyaskadakı "Elmendorf-Riçardson" aerodromunda qarşılayıb. Tramp və Putin təyyarələrindən eyni vaxtda çıxıblar.
Kramatorskdakı ukraynalılar Tramp-Putin görüşünə fərqli yanaşırlar
Ukraynada ön cəbhədəki Kramatorsk şəhərində müharibədən yorulmuş ukraynalılar ABŞ və Rusiya liderlərinin 15 avqust Alyaska görüşü barədə fərqli fikirdədirlər. Bəzi yerli sakinlər Rusiya bayrağı altında yaşamağı rədd edəcəklərini deyirlər. Digərləri isə sadəcə müharibənin bitməsini istəyirlər.
Alyaskada Ukraynaya dəstək aksiyası
Ankoricdə ABŞ və Rusiya prezidentlərinin sammiti ərəfəsində Ukraynaya dəstək və Vladimir Putinin gəlişinə qarşı mitinq keçirilib. BBC xəbər verir ki, aksiyada bir neçə yüz adam iştirak edib.
"Anchorage Daily News"un məlumatına görə, Alyaskada minə yaxın ukraynalı qaçqın yaşayır.